विराटनगर, १५ असार २०८०। विराटनगर वडा नम्बर १० को आर्थिक सहयोगमा शब्द सरोबर प्रालिले आयोजना गरेको १५ दिने लोकसेवा तयारी कक्षा तालिम र नेपाल प्रेस इन्स्टिच्यूटले आयोजना गरेको आधारभूत पत्रकारिता तथा रेडियो उद्घोषण तालिमको संयुक्त कार्यक्रम गरी समापन गरिएको छ । लोक सेवा तयारी कक्षा असार १ गतेदेखि सुरु गरिएको थियो भने आधारभूत रेडियो उद्घोषण तालिम ७ गतेदेखि सुरु गरिएको थियो । 

समापन समारोहलाई सम्बोधन गर्दै विराटनगर महानगरपालिकाका मेयर नागेश कोइरालाले तालिममा सिकेका सीपलाई व्यवहारमा उतार्न प्रशिक्षार्थीसमक्ष आग्रह गरे । उनले विभिन्न तालिमका माध्यमबाट विराटनगरका युवाहरुलाई स्वरोजगार बनाउन महानगरले सहयोग गर्ने प्रतिबद्धतासमेत जनाए । मेयर कोइरालाले रेडियोको महत्व कहिल्यै नघट्ने उल्लेख गरे । 

विराटनगर हरेक हिसाबले पछि परेकोले कम्तिमा पनि पहिलेको साख जोगाउन सबै मिलेर लाग्नुपर्ने बताउँदै मेयर कोइरालाले विराटनगरका युवाले कम्तिमा पनि लोकसेवामा आफ्नो नाम निकाल्न सफल भए यहाँको इज्जत बढ्ने थियो र गौरव गर्न सकिन्थ्यो भने । 

वडा नम्बर १० का अध्यक्ष अर्जुन गिरीले चालु आर्थिक वर्ष स्वरोजगारमूलक विभिन्न ६ वटा तालिम सञ्चालन गरेको बताए । उनले लोकसेवा तयारी कक्षा, जुत्ताचप्पल, अचार, रेडियो उद्घोषणलगायतका तालिम सञ्चालन गरेको जानकारी दिए । वीएफएमका कार्यकारी निर्देशक डा. सन्देशदास श्रेष्ठले रेडियोको उपादेयता कहिल्यै नघट्ने दाबी गरे । उनले सुन्ने माध्यम र तरिकामा परिवर्तन भए पनि रेडियोको महत्व सधैं रहने स्पष्ट पारे । 

कार्यक्रममा नेपाल प्रेस इन्स्टिच्यूटका अध्यक्ष मोहन भण्डारी, शब्द सरोबरका अध्यक्ष तथा वरिष्ठ पत्रकार यज्ञ शर्मा, प्रेस इन्स्टिच्यूटका प्रदेश संयोजक वीरेन्द्र शर्माले तालिमको उद्देश्यलगायतका विषयमा केन्द्रित रहेर मन्तव्य राख्खेका थिए । 

कार्यक्रममा शब्द सरोवर प्रालि विराटनगर–११ ले आयोजना गरेको १५ दिने लोकसेवा तयारी कक्षाको समेत समापन गरिएको थियो । कार्यक्रममा सहभागिताका तर्फबाट कविता पोखरेल, उपेन्द्र काफ्ले, इसु पन्त, भलि सुब्बा, प्रेमकला डाँगीले तालिम उपलब्धिमूलक भएको भन्दै आ–आफ्ना अनुभव सुनाएका थिए । एक जना प्रशिक्षार्थीलाई बीएफएमले रोजगारी दिने भएको सो एफएमका कार्यकारी निर्देशक डा. सन्देशदास श्रेष्ठलेजानकारी दिए । 


सोही क्रममा मेयर कोइरालाले सुर्तीजन्य पदार्थको सेवनका कारण स्वास्थ्य र महानगरको सरसफाइमा प्रतिकूल असर परेको बताउँदै नियन्त्रण अभियानमा साथ दिन महानगरवासीसित आग्रह गरे । उनले साउन १ गतेदेखि सुर्तीजन्य पदार्थ बिक्रीका लागि नयाँ अनुमति नदिने र यसअघि दिइसकेका अनुमतिपत्र पनि नवीकरण नगर्ने प्रस्ट पारे । 

उनले पछिल्लो समय विराटनगरको पहिचान गुम्दै गएको भन्दै चिन्तासमेत व्यक्त गरे । विराटनगरको नयाँ पहिचान खोजी गर्नुपर्नेमा उनले जोड थियो ।